Sumarið hefur verið heldur blautt fram að þessu en við höfum fengið nokkra góða daga og fundið ýmislegt skemmtilegt að gera til að brjóta upp starfið. Heimsmeistaramótið í fótbolta sett svip sinn á starfið í júnímánuði og meðal annars var leikur Íslands á móti Nígeríu mönnum sýndur með skjávarpa inn á Móholti þar sem börnin voru búin að gera sér kórónur og fengu andlitsmálningu með íslensku fánalitunum.
Nokkuð hefur verið um vettvangsferðir, eldri börnin farið í Húsdýragarðinn, í Hellisgerði og í fjöruferð ásamt gönguferðum um nágrennið og yngri börnin gengið niður að læknum og á önnur leiksvæði í grenndinni.
Náttfataball var í salnum 6.júlí, allir mættu í náttfötum og gerðu sér glaðan dag. Stuð og stemming á rigningardegi : )
Í útiveru eru börnin stundum að smíða, með sápukúlur og að lita fyrir utan hefðbundna útileiki í sandkassa, rólum, boltaleikjum og fleira.
Elstu börnin sem byrja í grunnskólanum eru smám saman að kveðja okkur og verður þeirra sárt saknað. Kveðjustundin er oft erfið.
Sumarleyfi starfsmanna og barna setur að sjálfsögðu svip sinn á starfið. Deildir eru sameinaðar og núna eingöngu börn á Hraunholti og Móholti. Þrif á leikskólanum, framkvæmdir og skipulagsbreytingar eru í fullum gangi og við þökkum þolinmæði vegna þessa. Búið er að færa sérkennsluherbergi þar sem bókasafnið okkar var færa bókasafnið þar sem geymsla var og færa undirbúningsherbergi starfsmanna á Vinaholt. Mikil vinna sem gengur rosalega vel með öflugu samstarfi allra.